आर्यघाटका दुईवटा धुनी

तिमी ज्यूँदा छौ
तिम्रा आँखा खुल्लै छन्
र छ जागृति तिमीमा
त्यसैले,
परम सत्यको समर्पणमा
भोलेनाथको नाममा
धुनी जगाउँदैछौ तिमी
महाशिवरात्रीमा ।

तर,
तिमीसँगै छ आर्यघाटमा
एउटा पार्थिव आकृति पनि
जो बन्द आँखाका वावजूद पनि
तिमीले कल्पेको सत्य ओढ्दै
जुटेको छ अन्तिम तयारीमा
आफ्नै अन्तिम धुनी जगाउन ।

फरक यत्ति–

तिमी आँखा खोल्दैछौ
सत्य वैराग्य अनुभूत गर्न
र, अर्काको धुनीमा लीन हुन ।

तर ऊ,
बन्द आँखाले संसार हेर्दोछ
र सुम्पिंदोछ
सत्य सार आज
आफ्नै धुनीमा
स्वयं विलीन हुन ।।