तीन हाइकु

शून्य
अस्तित्वको आदि
अनि यसको अन्त
अङ्कअघि एउटा अर्थ
अङ्कपछि अर्कै अर्थ
गुणनको गर्तमा लुकेको
जीवनको गणित ।।।

परिधि
वृत्त पृथ्वीको
शून्य आकृति
त्यही आकृतिको
अन्तिम रेखा
रुसोको जन्जीर
वा हाम्रो लक्ष्मण रेखा
सीमित–असीमित
दुवैको सीमा ।।।

जीवन
शून्य गुणनको
परिणाम बिर्सी
माया, मद, मुद्राको
एकोहोरो लेखा राख्दै
छाल, काल, तथा ज्वारका
प्रत्येक परिधि नाघ्न उद्धत्
सागर तर्न खोज्ने
छिद्रयुक्त डुङ्गा ।।।